中大學生迎新，搞「四院互片」，弄出一單「新亞桑拿」事件，《蘋果》大字報道，圖文並茂，於是有人話「錢穆在墳墓裏打轉」；左丁山睇完新聞，以為啲新亞書院學生玩嘢玩過龍，值得鬧，但唔值得要開除學籍咁交關，十八九歲嘅年輕人，玩大咗，當佢錯一次，吸取教訓囉。點知好多老友要左丁山「表過態」，你估我係楊大社長咩，表態嚟做乜？
之不過讀者要左丁山表態（一位測量T來函），就唔表唔得，讀者乃《蘋果》之衣食父母，肥老黎嘅老闆，佢哋有合理要求，盡可能範圍之內（唔識答就冇得好講）都要解答吓。答之前，要做番啲功課，於是搵一個二十歲大學生問吓，大學生話：「唓，你哋好似不食人間煙火咁清高，使乜咁緊張呀。舊年我啲中學同學入港大、科大、理大，咪一樣俾人玩到殘；今年佢哋玩番啲新生夠本，係咁簡單啫。中大生你估會特別道德啲咩！」佢將一啲中文大學學生嘅聲明畀左丁山睇，跟住就去咗打機。
睇咗一輪，先知道「新亞桑拿」海報唔係新亞學生創造嘅，而係逸夫迎新營製造出嚟去「悶」或者「砌」新亞學生，經傳媒報道，好多人（包括左丁山在內），就誤會咗「新亞桑拿」係新亞學生嘅傑作。經新亞方面強烈抗議後，逸夫迎新營籌委會喺九月三日發表聲明，向新亞書院及受影響嘅新亞同學致歉，聽日再講。