光線槍遊戲總離不開警匪大戰、射喪屍打怪物，新意始終有限。NAMCO就推出一款以古代忍者為題嘅槍擊遊戲《NINJAASSAULT》，Game內忍者揸住支槍消滅敵人，淨係創意已夠吸引，現在此Game由街機移植到PS2。雖然呢隻Game要到下星期四先派貨到各大Game舖，不過筆者有幸得到一隻完全版作測試，今日就為大家預覽一下NAMCO呢隻移植版槍Game到底表現如何。
記者：徐影龍
遊戲類型：光線槍射擊
對應機種：PS2
遊玩人數：1至2人
開發商：NAMCO
發售日期：9月12日
售價：$342
(C)20002002NAMCOLTD,ALLRIGHTSRESERVED
《NINJAASSAULT》故事骨幹圍繞天津國，其公主琴姬被鬼骸王軍團擄去，屬下之三名忍者侍衞紅蓮、群青及葵奉命營救，最後消滅嚟自魔界嘅鬼骸王及其左右手影忍。遊戲內場景及氣氛充滿和式風格，而且連敵人都以魔界忍者登場，特別需留神遠處放冷箭嘅射手，當然唔少得每關巨大兇狠嘅首領角色，氣勢上幾有壓迫力。
今次主角們雖屬忍者身份，不過並非使用傳統武器手裏劍，而係一把名為「魔破銃」嘅神器迎擊敵人。由於玩家身份為忍者，故此場景轉換及視點角度都會飛嚟飛去，雖非自由行動，不過都算幾有忍者Feel。
除主幹故事嘅ARCADE模式外，PS2移植版特別新增多三個故事模式，以三位主角當中的兩位配搭而成，雖然內裏關卡一樣，不過故事、遊戲目的、難度及關卡順序亦不盡相同，就算之前玩慣街機都唔會覺悶。
另一樣新加模式，就係「ExtraMode」，內裏有兩大玩法，分別為「MissionGame」及「TrainingGame」。前者設立各式過版條件考驗玩家，如9秒內消滅敵人、不可受傷等，總數共有32個任務，玩家需漸進式攻破，打完Part1先打Part2。而「TrainingGame」則以訓練玩家各種技巧為主，如準繩度、命中率、辨認平民等五大類。總括嚟講呢隻《NINJAASSAULT》遊戲模式頗豐富，要全部完成非一朝一夕可做到。
當初《NINJAASSAULT》在街機上出現時，曾被機迷評為高手級遊戲，因為遊戲難易度設定得頗高，新手玩家轉眼就GameOver。今次PS2移植版難易度分為五級，若以Normal級數玩已等於街機設定，Hard及VeryHard真係難以想像，新手玩家應該調校至Easy以下作熱身及熟記敵人位置。
有NAMCO皇牌《TIMECRSISII》及同世嘉合作嘅《VampireNight》珠玉在前，《NINJAASSAULT》不論畫面及遊戲性均有所不及，難度高及忍者風格在港不流行等亦成不利因素，不過平心而論，遊戲極具爽快感，而且模式豐富，要解開所有隱藏要素需花較多時間，遊戲壽命頗長，加上市場上極缺乏槍擊遊戲類型，喜歡呢類玩法嘅機迷好應該支持。