呢兩個星期日日都有人唱高寶綠色（274）有得炒，但只見成交相當大，股價就升唔上去。小初覺得有散貨迹象，但經紀陳話隻股再坐一會，就會再炒上。
高寶早排公布業績唔錯，有息派又有紅股送，兼且又同大陸方面簽約，合作大搞污水處理，上周初重見有彤叔同埋老友一齊出席高寶嘅活動助興。
雖然隻股聲勢浩大，但近日股價最高都係炒過上去2.275元，連續好幾日成交都過千萬元，但股價就唔升。噚日再跌2.35%，收2.075元，真係容咩易2元都守唔住。不過，最諷刺就係剛剛有間歐資行，幫高寶出咗個研究報告，話佢值3元樓上。
經紀陳話，高寶在仙股風暴中曾受牽連，跌過落去1.50元，但之後就一條氣炒上嚟，幕後人見個勢咁靚，散多少貨套現亦係正常事。估計稍後送完紅股及派息後，就會有番鑊氣，皆因重有批債券夠期要人換股。
慕容小初