朗拿度踢完世界盃之後，大跳草裙舞，卒之離開國際米蘭，投身皇家馬德里。佢以前嚴重受傷，休息兩季，國際米蘭待佢不薄，點知佢一攞完世界盃，恢復八成狀態就立即要求轉會，難怪國米球迷鬧佢反骨。
不過世界上，任何球星都係一件貨品，國米放走朗拿度，攞番基斯普再加一名皇馬球員（任揀一位，身價唔超過一千萬歐元），肯定冇蝕底；反而朗拿度加入皇馬之後，理論上與Raul拍檔，無堅不摧，加埋有費高、施丹供應，卡路斯助攻，夠晒犀利。
之不過，粒粒皆星，邊個做擔抬工夫，死纏難打去搶波、攔截呀？純粹靠攻嘅球隊，未必可以贏晒（wineverything，朗拿度如是說）。米高佐敦講過：「贏場波可以靠進攻，但贏冠軍就靠防守。」米高佐敦喺籃球場上嘅進攻能力，勝於足球場上嘅朗拿度，睇吓今季邊個啱。
朗拿度轉會，最傷心嘅原來係佢位美人太太。朗拿度夫人在意大利踢女子足球，踢得唔知幾高興，知道朗拿度真係轉會之後，一個人喊咗兩個鐘頭，喊得夠晒長氣。佢以後住在馬德里，與意大利女子足球絕緣，正所謂嫁雞隨雞、嫁狗隨狗，佢嫁咗一條足球之龍，更加要做跟得夫人啦。就算紅到好似辣妹Victoria咁，嫁咗碧咸，生咗兩個仔，歌唱生涯想唔受影響都幾難，有人問碧咸會唔會攞「產假」（英國勞工有此權利）陪老婆，真係識得講笑，佢攞產假嘅話，激死費爵爺都似。