大班鄭經翰同香港電台經常拳來腳往，都已經唔係乜嘢大新聞，但係大班一聽完對手個節目，就立刻還擊，就比較少有。噚日大班就示範點樣向「人民電台」即時還火。
話說噚日周融同大班晨早各自各開咪，開始時相安無事；點知周融一講就討論聽激辯節目會引人開快車，有聽眾打電話入去，將矛頭直指大班。唔知呢邊大班係咪收到風知道「對家」「郁佢」，即刻「還火」，先插「人民電台」唔先講地鐵停駛，走去講激辯節目會引致開快車；再「潤」「人民電台」搞埋呂秀蓮訪問之類節目，納稅人重要每年畀幾億港銀「人民電台」，聽到呢個台一樣會勞氣到「熱血沸騰」開快車。最後大班重話「教精」「人民電台」，應該播吓心經、宗教音樂，平和吓大家心情，又或者搞吓小眾節目，好似做潮州話、菲律賓話節目喎。
傳真︰2623-9278
電郵︰