毛冷台小生龍爪手年幾前曾傳過一單桃色新聞，話佢借醉博人懵，當時佢為咗呢件事，幾乎同佢𠵱家嘅老婆搞到離婚咁滯，雖然近年佢好似做番個乖老公咁，但始終本性難移，佢間唔中都會偷走出街，約埋啲朋友去中環同尖沙嘴蒲吧。
不過有次龍爪手又借醉，喺中環嘅Queen酒吧，同一個女性朋友帶嚟嘅靚女搭訕，初頭個靚女諗住同佢傾下偈，都冇乜點提防，點知龍爪手突然露出真面目，用佢隻龍爪手摸人哋屁股，靚女當堂發晒爛渣，講粗口狂鬧龍爪手，跟住重即刻拂袖離場，而同龍爪手一齊嚟嘅朋友都唔幫佢，最後成班朋友，齊作鳥獸散，剩番龍爪手一個人戇居居飲悶酒。
好心龍爪手就自我檢討一吓啦，做人又何必自取其辱呢！
蔡楓華不時胡言亂語，佢失蹤咗一排，前晚佢獨自去咗港台入面嘅會員酒吧飲啤酒。冇見蔡楓華一輪，佢成個形象都變晒，蔡楓華將啲頭髮染成金色，驟眼望過去，佢嘅側面同埃及嘅獅身人面像好鬼似，馮仁昭重以為自己去咗埃及㖭。蔡楓華飲到塊面紅卜卜，加上個梯形髮型，睇落亦有啲似一張階磚King啤牌，認真充滿娛樂性。
馮仁昭走上前諗住同蔡楓華傾兩句，佢即刻用個背脊背住，重話：「我冇嘢講，我唔做訪問。」唔知係咪蔡楓華飲大咗兩杯，佢講到興起時重拍晒枱，頗為激動。佢跟住又大鬧：「唔好勾我線……」蔡楓華最後靜雞雞喺港台前門坐的士走人。見到蔡楓華變成咁，都咪話唔叫人擔心。
電視台個大笑姑婆成日都四萬咁口，其實佢份人好斤斤計較。好似早排佢幫官方刊物影咗輯相，點知出街之後，大笑姑婆就埋怨輯相出嚟嘅效果，好似幫人哋賣緊家庭清潔用品廣告咁。大笑姑婆除咗向本書嘅高層投訴外，重話要搵律師研究，睇吓會唔會因為呢輯相嘅關係而影響佢接拍同類產品廣告，雖然最後佢都冇告到，但就搞到成間公司都知，啲人就覺得佢連官方刊物都唔畀面，確係小題大做。
有個女星一生坎坷，完全是因為誤交損友沉迷毒癮，先會誤咗自己一生，而佢阿媽又當佢係搖錢樹，個女星偷偷生咗個BB落嚟，自己已經理唔到之餘，佢個阿媽同個BB生父又一於好少理，個BB都幾慘，好彩個女星重有一位好有義氣嘅女朋友幫佢，除咗喺金錢上作出支持外，重幫佢照顧埋個BB，如果女星唔係識咗呢個好朋友，佢個BB就可憐囉！
向海嵐噚日喺電視城拍新劇《衛斯理》，《衛》劇都未拍完，佢就已經知道將會喺新劇《男人四十》裏面飾演一個爛撻撻兼食煙嘅天王巨星，平時斯斯文文嘅向海嵐話最難就係學吸煙，不過就覺得演呢類型角色有發揮。睇見向海嵐一劇接一劇咁拍，就知無綫幾重用佢啦！
過氣女歌手一向都嗜杯中物，近年佢鬱鬱不得志，就更加成為蒲吧常客，不過女歌手始終難棄昔日光輝，就算𠵱家佢去蒲吧，除咗必定化行靚妝set靚頭之外，重着到好似上台唱歌咁誇張，啲人離遠已經認得佢。而女歌手最勇嘅地方，就係佢可以單人匹馬去蒲，自己一個人飲到啤啤夫。其實做人總有起有跌。借酒消愁又何必呢，諗下點努力重實際啦。
吳雪雯自從嫁咗畀利豐雅高楊氏家族成員楊耀宗做老婆後，一直都好低調，好少出嚟蒲，但係佢噚日就一身黑衫，去花園道聖約翰座堂出席利豐雅高創辦人之一楊一貴嘅追思會，阿楊老先生早排喺加拿大仙遊，噚日出席追思會除咗楊氏家族成員外，重有時裝設計師鄭兆良嘅爸爸同「詩韻」老闆康健火喜等人。
環球唱片公司噚日發表聲明，宣布正東唱片公司嘅前任總經理黃柏高，以私人理由正式離任正東唱片公司一職，但會留任到九月底，而該職位由前任百代唱片大中華地區副總裁洪迪擔任。
黃柏高話：「喺正東做咗多年令我獲益良多，今次離職係想搵吓其他發展嘅好時機。」而洪迪就話：「要接手唔係易事，因為黃柏高將公司建立咗個穩固基礎，不過我有信心繼續創好成績。」