將於今個月底舉行嘅法國巴黎車展，各大車廠都會展出最新車款，以吸引車迷注意；而標緻車廠更於日前率先公布咗將於場內展出車款嘅資料，從而讓一眾車迷能先睹為快。不如今日就一齊嚟睇睇，部份將會展出嘅新車啦。
記者：鄭達基
曾於2000年巴黎車展展出嘅Promethee概念車，當時被認定係新款307車系嘅概念型號，及後於2001年5月成為事實；而今回呢部3?CC概念開篷車，難免會同樣被認為係未來307CC嘅先驅。較原有307來得低斜嘅車首設計，明顯令造型變得更具吸引力，加上有18吋跑車合金胎軨、電摺硬頂，及尾翼等配備襯托下，一派跑車形象表露無遺。而廠方亦表明，新車車廂能真正容納到四名乘客，空間較一般開篷車來得更闊落，設備配搭又見齊全，因而予人有方便及可靠之感。機械組合則與現有307車系相近，以滿足用家需要。
206自推出以來，一直成為車迷追捧目標，相信呢部擁有強勁馬力輸出嘅206RC，又會成為車迷嘅追捧對象。與206GTi一樣，206RC同樣以雙門形式出現，但就裝上17吋跑車合金軨、雙出式尾喉、車尾定翼、桶形跑車座椅等等，務求能將其高性能跑車形象展示出來；另外，一台2.0公升直4引擎，馬力輸出高達180ps/7000rpm，扭力則為20.6kgm/4750rpm，匹配一套5前速手波，難怪新車可有不俗嘅性能表現，加上跑車化懸掛及制動配搭，亦可令新車有不俗嘅操控表現呢！
呢部607Pescarlo外觀上雖沒多大改動，但當細心留意下，就會發覺佢改換上19吋跑車合金軨連245/45R19高性能輪胎、車高被下調25mm同尾燈改用新配搭等等，從而令造型變得更富活力。車內座椅改用新設計，承托力十足，兼備有Sequential半自動波箱供用家選擇；同時為增強制動表現，廠方更為其改換上四輪345mm高性能煞車碟㖭。