港股噚日收報9720，跌5點，成交58億元，表面看似牛牛皮皮冇咩特別，不過睇真啲，滙豐（005）出現暗湧，全日成交達14億元，佔大市總成交逾24%，而中移動（941）全日成交亦達5億元，雖然兩股股價跌幅唔算顯著，不過有傳聞話淡友已經加大空倉，似乎將有所行動，睇嚟又有對沖基金吼住盈富（2800）新一季發售額做嘢。
歐亞農業（932）連續6日下挫，由1.03元跌至噚日0.68元，累積跌幅達34%，而且每日成交都有數千萬元，明顯有芬佬洗倉。阿虎問黑客究竟芬佬洗完倉未，可唔可以入市撈底？黑客話，歐洲芬佬一直減持民企，歐亞亦係減持對象之一。最近市場傳出伊藤忠擬入股歐亞，刺激股價重上1元，芬佬亦暫時停止沽售，轉為觀望，可惜日資入股消息再無下聞，芬佬覺得被搵笨，所以近期沽得更勁，𠵱家入市想撈底，真係要諗過先。
高富民提出以每股3仙，或以1股江山控股（295）換8股國際融資（8004）嘅比例，來全面收購國際融資，作價相當於960萬至1000萬元。
國際融資去年底上市時，以每股0.84元發售1億股，集資8400萬元，至今所動用嘅資金唔多，國際融資股東又點肯賤價沽售，所以今次高富民嘅收購行動，除了阻礙國際融資進行重大交易或配發新股外，基本上沒有其他意義。
近排唔知係咪個市真係太悶，市場竟然有人接二連三玩呢類小把戲，證監會是否應該研究有關情況，阻止有人濫用收購合併條例去限制企業行動呢？
阿 虎