公務員事務局局長王永平噚日親自去到九龍城區議會，向區議員講解高官問責制。咁講到高官問責制，自然唔少得講到公務員嘅角色啦！不過，八方知道，平叔心情幾靚，除咗講吓公務員要政治中立等等嘅老生常談講法外，平叔重會講吓「笑」㖭！
平叔喺會上話，公務員除咗要有效率外，重要識笑，因為每個公務員都代表埋其他公務員，亦代表埋政府；如果政府同公務員多啲溝通，增加佢哋嘅歸屬感，佢哋自然就會多啲笑容啦，咁就即係成為咗政府嘅親善大使嘞！
咁喺減薪威脅下，公務員又究竟笑唔笑得出呢？平叔身為公務員事務局局長，梗係明白公務員嘅心情啦，所以佢笑笑口咁話：「可能佢哋（公務員）笑唔出，迫佢哋笑，又可能笑得重難睇啦！」即時引來哄堂大笑。平叔又旋即提出解決方案，就係由地區發起一啲行動，鼓勵市民平時多啲笑，感染吓啲公務員！
聽完平叔一番偉論後，有區議員就想到，既然街邊啲燈柱燈箱同電箱經常俾人貼滿街招，倒不如留番畀政府或地區團體用嚟貼啲「笑一笑」嘅標語，咪重好囉。大家對此又點睇呢？
傳真︰2623-9278
電郵︰