朗拿度加盟皇家馬德里都已經有好幾日，但係關於佢同古柏嘅罵戰新聞認真日日新鮮。之不過，「哨牙仔」拖埋兩個舊隊友安利同奧簡落水，我求大俠真係有啲睇唔過眼！
自從朗拿度走咗之後，國際米蘭教練古柏一直話佢自私、無良心；結果「哨牙仔」終於發炮話除咗自己之外，重有一個由小部份國際米蘭球員組成嘅「反古柏聯盟」，極之唔妥呢位白頭教練，而且重爆咗兩個土耳其球員安利同奧簡出嚟。
話時話，佢兩個𠵱家重喺國際米蘭，朗拿度咁搞法即係叫佢哋今季唔使出場啫，積吓口德好噃！
那邊廂英格蘭嘅瑞典籍領隊艾歷臣就要同各大球會紮晒馬咁要人，呢頭威爾斯嘅曉士就有紐卡素領隊卜比笠臣畀面放件快馬比拿美歸隊；我求大俠就認為咁樣睇到曉士響英格蘭球壇都幾受尊重。相反話晒都唔係英國人嘅艾歷臣，就唔係個個都肯畀面，尤其是要交手嗰位係費爵爺㖭。
未投身英超聯之前，戴奧同迪奧夫都曾經講過，一定會顧及國家隊賽事，以代表佢哋對塞內加爾忠心耿耿。點知到英倫唔夠三個月，兩位仁兄就拒絕歸隊參加周日到塞索托進行嘅非洲國家盃外圍賽，聽講係唔滿意新教練喎。吓！又話對國家忠心，咪又係得個講字！
有睇開意大利甲組聯賽都知道當地球迷好鍾意偷運煙花喺觀眾席放，搞吓氣氛，之不過透過電視直播睇波嘅球迷就乜都睇唔到。我求大俠知道新一季會合法畀球迷帶煙花入球場，咁搞法到時睇啲強隊大戰咪淨係見到電視機畫面煙霧瀰漫？
皇家馬德里就買咗朗拿度，同市馬德里體育會亦唔執輸，佢哋支女子隊有意搵朗拿度老婆美蓮妮過檔，實行借朗拿度係西班牙大熱博宣傳，吸引球迷入場睇女子隊賽事。我求大俠知道美蓮妮個人腳法上乘，若果搵到佢加盟肯定叫好又叫座！