歌星郭富城放咗好耐嗰間壽臣山榛園三千幾呎嘅大屋，都算峯迴路轉，多次傳出成交，但到最後又不了了之。噚日又聽到間屋成咗二千一百萬，呎價六千六，個價愈傳愈低，唔知幾時，郭富城肯行出嚟證實吓呢？
講開名人買樓，白花油王子顏福偉，最近又買樓。聽講佢啱啱用咗1128萬元，買咗渣甸山嘉雲臺一個高層單位，千九呎，呎價五千九蚊，都幾合理。佢而家住緊嘅跑馬地樂陶苑，單位有千二呎，今次換嘅新屋唔大得好多，但級數就爭好遠，睇嚟佢唔係旨在換大屋，淨係想住得豪啲啫，話晒佢都係上市公司執行董事。
芸芸上市公司董事之中，顏福偉個名咁多人識，係因為佢曾經當過歌手，又擔任過保良局總理，喺娛樂界同商界都有知名度。
中國入世後，內地市場逐漸開放，美聯為咗擴大工商舖嘅市場佔有率，積極進攻內地寫字樓及舖位市場，更會在港成立專責租務小組，實行中港兩地雙線發展。工商舖揸fit人黃子華話，將招聘一批有大專學歷，或有會計、律師等專業資格嘅人才，月薪有成二萬蚊，相當落本。
用咁高月薪請人，舖位部阿頭盧展豪解釋，佢哋要負責商場、食肆同大型連鎖店租務，要提供高水準嘅服務畀客人，自然要高啲質素嘅員工。公司初定請10個人，希望提高市場佔有率，由現時嘅10%，增加至15至20%。
近排地產代理輪流做獨家盤，但壓力好大，要定期向發展商「交功課」。為咗保住個招牌，中原每周有新優惠促銷元朗蝶翠峰。
上個禮拜送裝修，今個禮拜就搞送車同入油券。
即日選購該盤4房單位買家，獲贈價值15萬元HondaStream系7人房車。買2房同3房單位買家，則可得價值11萬元的Jazz系4人房車，除2房單位買家外，其餘買家均享2萬元入油券。優惠總值最高達17萬。
北角半山住宅樓齡較大，但環境清幽兼有好校網，所以捧場客多。美聯物業北角豪宅分行經理曾令村話，旗下Angus謝，一日做成咗兩宗慧雅閣租盤。
其中A座高層2室，二千三呎，連雙車位，全包月租四萬；另一個C座高層1室，二千一呎，連一個車位，月租三萬七。照咁計，Angus謝今個月條數未必差過做一手樓嘅同事。
新地近期send咗個電郵畀啲客，抬頭係「馬灣珀麗灣向隅客」，主要係通知佢哋，小欖愛琴海岸就嚟賣，價錢十分吸引，同時，亦將各代理行自費送出嘅優惠都列埋出嚟。一句講哂「個盤好抵」。
另外，新地話，凡有興趣買呢個盤嘅珀麗灣向隅客，只要填咗份優先認購表格，揀埋想委託嘅代理行，新地就會通知有關代理，安排參觀示範單位同辦理認購手續。新地嘅售前服務相當周到。
蘭西
電郵地址：