港股噚日又開始反覆回落，收報9726，跌94點，成交不多，僅51億元。期指跌破9700水平，收9695，跌135點，低水31點。市場主要憂慮美股周四晚再跌過，唔少資金繼續由股票市場流入債券市場。不過，一旦美國攻打伊拉克，油價上升，影響經濟，恐怕連債券市場亦難以安身。
法改會噚日建議為臨時買賣合約定出3日冷靜期，以壓抑樓市炒風。呢個消息真係令阿虎啼笑皆非，其實呢件事早應在7、8年前就要做，但當時唔做等到𠵱家至做，真係搞笑。
𠵱家政府要做係助長炒風，讓樓市復活，而唔係踩多兩腳，真係唔該各位大老爺放過樓市啦，樓價若再跌落去，盞大家攬住死。
龍發製藥（2898）首日掛牌，收0.355元，較招股價0.34元高4%，表現比預期遜色。ｉ師傅話，主要因為公開發售過於踴躍，以致貨源唔集中，相信要一段時間收集才可開車。
21世紀通（241）傳出會成為北京中信嘅電信企業旗艦，股價噚日勁升28%，收0.244元。原來此股已由低位反彈逾倍。Cookie話，國內股市雖然唔係好掂，不過PE仍遠比香港股市為高，北京中信基本上無需要來港借殼上市，有關消息是真是假，需持保留態度，而值得留意係21世紀通近期已表明無嘢傾緊。
新銀集團（988）於上月底股權易手後，股價反覆造上，噚日再升12%，收2.8仙。阿虎問黑客此股有乜搞作？佢話冇咩特別，只是乾炒牛河一碟，不過夠唔夠鑊氣就唔知，因為重未知新莊家底細，但單從成交量睇，相信都係普通料。
阿 虎