好耐冇見功夫L，問佢旺角呢排水貨生意銷情如何？功夫L皺皺眉頭：「呢排銷售仍然不濟，暑假仍然淡薄，好多舖頭全靠之前積落嘅彈藥，睇嚟呢兩年大家都係打消耗戰，邊個捱得耐就邊個贏。」
功夫L話除咗靜之外，最怕係假卡黨，其實佢哋喺旺角水貨舖已出沒一段日子，招數層出不窮，「以前好易拆穿佢哋。通常瘋狂掃貨，衣着九唔搭八就多數係假卡黨。不過最近班友竟然高班咗，買一兩千蚊貨都用假卡，最呃得我哋透係個個都着晒猿人、拉把酷，腳踏科時或悲時打，比時下後生仔更裏原宿，我哋點會有戒心？聽講兆萬二樓有間大舖，最近咪又係中埋招，使假卡條友着住對MT（編按：即NewBalance580特別版，巿值$5,000，為旺角區最神聖波鞋），東主掛住望鞋不虞有詐，點知過兩日銀行通知中咗招。𠵱家啲水貨舖人人自危，有啲收卡只肯收熟人，否則隨時因為中一張單就白做一個月。」
主持人：大食Jack
八卦熱報：