財爺阿松一個大信封掟落嚟，個個部門都要為點樣削減百分之一點八資源傷腦筋，不過阿松辦公室派完信封，已經忙緊第二樣更傷佢哋腦筋嘅事。
唔知大家有冇忘記九月十號呢個特別日子呢？相信整個財金系統嘅人就一定唔會忘記嘞。八方聽講松辦好多人已經為可能會喺當日公布嘅仙股事件報告籌備緊，為報告提到嘅所有可能性做足工夫，減低對外嘅震撼，最重要梗係修補政府形象啦。不過咁，松辦到噚日重未收到二人小組做嘅報告，都唔知邊個中箭最多。
話時話，政府、港交所同證監會喺呢件事上面，唔妥已經係公開秘密，有人就等緊睇多場好戲，唔知到公布報告當日，會唔會有更加入戲嘅互相責難鏡頭呢？
順便講多句，阿松搞掂完份報告之後，九月底就飛去美國，出席華盛頓的IMF年會，再轉飛多倫多訪問，可以話順道避開香港嘅風風雨雨。
傳真︰2623-9278
電郵︰