雖然大凌集團（211）大股東張老闆揚言退隱江湖，但偏偏市場對大凌嘅傳言就一浪接一浪，簡直奇哉怪也。繼上次傳出有兩個大陸客想敵意收購大凌，令到供股計劃告吹之後，今次又有新消息。賓架陳話，竟然聽聞有個行家接到order幫大凌放盤賣殼。
張老闆近排捲入肥仔嗰場官司，至於件事會點收科，仍然係金融界人士所關心嘅話題，但與此同時，大凌就繼續新聞多多。
大凌早排供股不成，股價急升咗一輪，但近幾日則見到唔少沽盤，噚日就好番啲，升4.3%，收7.3仙，但成交金額只得40幾萬銀。不過最離奇係唔少沽盤來自公司嘅友好，搞到傳聞真係疑幻疑真。
同上次傳聞話大凌被大陸客狙擊一樣，賓架陳都話唔信大凌會放盤，畢竟佢同唔少創業板股份，有着千絲萬縷嘅關係，若然真係股權易手，要解番開呢啲結都幾高難度。
總之一句講晒，唔好諗住大凌有賣殼傳聞就亂咁上車。
慕容小初