盧巧音是標準貓癡，早前去泰國拍電影《好心相愛》，半夜三更竟然因為掛住家中兩隻貓而流淚，而她亦因為拍攝此片，與男主角任賢齊在不用埋位時一齊滑水，變成好朋友。
盧巧音和任賢齊早前去泰國蘇梅島拍攝電影《好心相愛》，用了接近一個月時間，戲裏面的劇情幾乎場場都和食有關，於是盧巧音戲裏戲外都不停飲飲食食，所以一個月下來，增了不少磅，現時要積極減肥。
而拍檔任賢齊，未埋位時最鍾意攞住攝錄機不停拍攝，盧巧音和任賢齊今次合作得十分愉快，不用拍戲時，更約埋一齊去滑水，兩人都曬黑了不少，二人亦因為拍攝該片而成為好朋友。
而日前盧巧音接受寵物雜誌《PetsShow》訪問時，她表示屋企養了兩隻貓，一隻是蘇格蘭短毛貓，一隻是美國短毛貓，她認為自己的性格和貓很相似，大家都是有性格、不太服從、不太聽話。平日表現硬朗的她，在去泰國拍電影時，半夜就因為掛住屋企的貓而喊。
盧巧音說：「我去泰國時，將兩隻貓寄居喺經理人屋企，但係真係好掛住佢哋，試過半夜因為掛住佢哋掛到喊，因為我當佢哋係仔女、朋友，唔開心嘅時候會同佢哋講嘢，雖然佢哋唔知我講緊乜，但會眼定定咁望住我。」
盧巧音為了兩隻貓，一放工就即刻返屋企，她說：「因為好擔心佢哋冇嘢食，又驚佢哋食唔飽，佢哋通常都會喺屋企門口等我返嚟。」