梁詠琪（GiGi）兒時最愛的玩意原來是剪紙和砌積木，她覺得兩樣玩意都可充份發揮她的創意，現在有時百無聊賴都會拿起紙張玩玩。中秋將至，GiGi透露她每年中秋都會在家中點起兔仔燈籠，認真夠氣氛。
梁詠琪日前為新一期《COSMOgirl!》拍攝封面照，大玩摺紙及車仔。GiGi又合上眼睛平躺地上，只見她身上放着三輛色彩繽紛的木頭車仔，一副十分享受的模樣。
原來GiGi小時候亦很喜歡玩摺紙遊戲，她日前在電話訪問中說：「我細個都好鍾意摺紙，我識得摺紙鶴，心形同衫仔。」除了摺紙，GiGi的剪紙造詣更高，她說：「我玩剪紙都幾叻㗎，利用鉸剪可以做出唔同嘅圖案，又可以表達到創意。𠵱家我無聊起嚟，都有攞把鉸剪玩吓。」
然而GiGi幼時最喜歡的玩具卻是積木，她說：「我鍾意同細佬一齊玩Lego，砌出一間屋，然後再設計廳同睡房，真係好開心。」
還有兩個多星期便是中秋佳節，GiGi即想起兔仔花燈，她說：「細個嗰陣，公公婆婆都一定買兔仔燈籠畀我玩，𠵱家每年我都會買個喺屋企點，好有氣氛，好好玩。」