電腦J問左丁山：「對新亞桑拿有乜意見？」吓，我哋啲老餅都冇say嘅，講嚟做乜？電腦J話：「佢哋啲口號幾押韻，有創意噃？」唓，有乜創意，照抄啫，睇得《蘋果》G版多，睇得《壹本便利》多，唔識寫都識抄啦。大學生興睇《壹本便利》，大學生玩粗俗玩意，亦受「壹記」影響而已，所以睇到《蘋果》社論鬧大學生，我哋幾乎笑到噴咖啡，《蘋果》同「壹記」高層唔知有乜感想呢。
一位sales話，某雜誌銷量多，近來廣告量下跌，有啲奇怪。其實做傳媒，最過癮就係銷量少廣告多，其次就係銷量多廣告多，最慘就係銷量多廣告少，一定蝕到暈，黃金時代嘅《星島日報》就係銷量少廣告多嘅典型，賺到笑，稅後純利佔收益百分之四十幾。
點解會銷量多，廣告少呢？原因好多，其中一個就係雜誌內容與廣告對象不符。譬如一間科技機構招聘IT人才廣告，喺某青少年暢銷雜誌刊登，廣告隔籬突然係「色情內容」，科技機構認為與形象不符，以後立即抽稿；簡單咁講，色情係刺激銷量嘅一個方法，但色情內容太多，會趕走好多大機構及高檔貨品嘅廣告，形成銷路與廣告量不對稱嘅局面。呢啲就係市場調節嘞，盲目追求通俗銷路，過咗一個optimalpoint，會產生反效果，令老闆損失㗎。