美股周三晚雖然全面反彈，但杜指只回升117點，收8425，力度並非太強，而前日港股逆勢倒升29點，已經先反映升勢，所以噚日冇跟隨美股反彈，反而下跌94點，收9726。
恒指MACD確認轉勢，除咗快線STC超賣反彈外，其他技術指標均偏淡，因此再以技術走勢分析後市則一定偏淡，現時反而要留意其他基本因素及突發消息影響股市走勢。美國呢兩晚有經濟數據公布，好壞將影響杜指會否跌穿8000點重要關口，對港股後市有好大啟示。
趙飛雲近日睇番長線技術形態，真係有些少觸目驚心。恒指98年港府入市低位6544延伸至今形成的上升軌，目前支持位約在9580水平，與恒指噚日低位9710相距大約130點，如果一旦確認跌穿，大市真係可以係咁先，911事件低位8894相信唔係底。照計呢類重大關口位會有一定支持力，除非外圍因素急速轉壞，否則應該唔會一腳就踏穿。
不過，趙飛雲準備再入番啲Put輪墊倉底，之前玩開嘅恒指Put輪9287，噚日收0.217元，溢價1.4%，引伸波幅去到30，稍嫌貴咗啲，其實市跌時縮溢價贏少啲唔係問題，最怕係大市出現短暫反彈時會跌得好急，無險可守。
由於睇個市會反覆向淡，因此選擇年期較長嘅恒指Put輪9444，大市出現反彈時唔會跌得太急。綜合而言，玩恒指Put輪應逐漸轉馬至9444。
趙飛雲