前晚美股好番啲，昨日港股反為唔得，恒指回落94點，主要地產股隻隻跌，有可能地產股再試上次低位，至完成見底，可以諗吓細細注喺地產股再跌啲之時，搵個別相關Call輪博短線反彈。新地Call輪9524面世3日，昨日最高42.5仙，收38仙，跌2.5仙。隻輪明年3月到期，溢價14.2%，槓桿率13.1倍。上市後最低價32仙，吼住接近呢個位買入。
恒地（012）收25.25元，跌60仙，短期內可能再試24.80元近期低位，再見呢個位時，執些少恒地Call輪9473。隻輪昨收20仙，跌7.8%，明年3月到期，溢價14.4%，槓桿率12.6倍。昅住喺18仙左右上車。
華創（291）前日派半年成績表，前日企定，昨日唔見20仙，收8.25元。盤數喺市場意料之中，大市氣氛唔好，股價點都要跌啲應酬應酬，再落到8字頭邊邊唔出奇，喺呢個位，撈啲華創Call輪博反彈。想快上快落嘅，揀仙輪9359，現價8.9仙，明年6月夠鐘，溢價23.3%，槓桿率9.3倍，7仙左右上車。正路揀9368，現價83仙，3個月後到期，溢價7.0%，槓桿率9.9倍，擺定個買盤70仙上車。
章 盛