五十五歲嘅阿姐呢排心情似乎唔多靚，大前晚喺電視城化妝間，有個記者用化妝間個電話用得耐咗，阿姐就突然黑晒面咁話：「喂，你用咗個電話成半個鐘，你知唔知個電話好重要㗎，係啲PA用嚟callartist㗎！」個記者即時收線，重同阿姐講對唔住，阿姐仍然唔收火，佢話：「你同我講對唔住係冇用嘅！」嚇到其他記者都唔敢出聲。
之後阿姐個女助手唔知做錯的乜嘢事，阿姐猛鬧女助手：「你冇用㗎，叫你做少少嘢都做唔掂，不如我自己做啦，你去死啦！」跟住阿姐走去斟水飲，點知蒸餾水機冇水，助手即時走去換水，阿姐話：「唔使你呀，同我搵個男人嚟！」
阿姐四圍望，咁啱張智霖入緊去，阿姐話：「邊個嚟㗎，算佢唔好彩！」然後大嗌：「ChiLam！」張智霖走埋去笑笑口話：「阿姐，有乜嘢幫到你？」阿姐開始有笑容：「幫我換水。」張智霖一路換水一路賣口乖話：「等我嚟，等我嚟。」阿姐喺隔籬開心到合唔埋口，張智霖果然好嘢。
有位姐仔呢排同一位哥仔行得好埋，好多人以為佢哋兩個拍緊拖，但馮仁昭就知道似搞吓新聞居多，因為個哥仔係有龍陽之癖，所以又點會鍾意女人呢？不過阿哥仔想搞吓緋聞做吓宣傳啫！佢個「密友」重係幫佢做嘢嘅，其實圈中都好多人知道佢哋兩個嘅關係，所以知情者就唔會相信姐仔同佢嘅緋聞。
九人女子組合Cookies人氣急升，Cookies成員之一嘅Angela（區文詩）是非多多。佢早前被傳拎蔡卓妍當年啲相出嚟畀傳媒後，Angela噚日又俾周刊爆料指佢喺十五歲時曾接拍三級片《無人駕駛》，重話戲裏面個男角係佢當年嘅男朋友㖭。
Angela噚日同馮仁昭講話嗰個男仔唔係佢嘅男友，而EMI嘅宣傳人員Carman就話：「公司簽所有Cookies成員都好清楚佢哋之前拍過啲乜嘢，其實《無》片只係意識三級，Angela都冇三級演出，佢都係遵照導演指導做戲啫。」
黃貫中（阿Paul）噚日去新城電台接受訪問，對於黃家強將加盟環球一事，阿Paul話一定會支持好友嘅決定。阿Paul重話喺下年暑假會搞一個Beyond二十周年嘅演唱會，因為到時亦都係家駒逝世十周年嘅日子。
噚日馮仁昭同一位電視台助導傾閒偈，佢話做高層最過癮，好似某女高層生日或者屋企要換新家具，佢只係同啲姐仔、哥仔透露兩句爭啲乜，好快就會有人將啲嘢送上門。好似音樂組高層，成日有唱片公司人員請佢哋落夜總會玩，連帶小姐出街都有人爭埋單，又真係幾爽，早排有個監製因為咁，重俾周刊影埋相，如果唔係記者俾人拆咗菲林，肯定手尾長。
韓君婷同姚樂怡噚日出席無綫「九月星辰」慶祝會，鬼妹韓君婷話正日生日會去澳洲出埠做嘢，提到生日願望，佢話：「希望多啲嘢做啦！」問到瘦身成功嘅鬼妹，有冇多咗工作機會，佢就話：「機會比以前多咗，待遇亦都好咗，可能重新包裝過自己感覺唔同啲，重多咗好多高級品牌搵我㖭。」