出版《福布斯》雜誌（Forbes）的美國福布斯集團總裁史提夫福布斯昨日旋風訪港，八方同佢喺中午十一時半做了半小時的訪問。其實佢整日忙到極，早上八時出席外國記者會主辦的早餐會，其後上港台及鳳凰衛視，而早餐前就接受CNN香港分部訪問。到十時半，去見財政司司長梁錦松，談了半小時才與八方見面。
跟住，福布斯去麗嘉酒店出席香港美商會的午餐會，大談全球經濟前景及香港經濟，筵開二十席，座無虛設。八方當然要捧場，只見佢手無講稿，但絕無冷場，美式幽默發揮到最高峯。例如話今次演講有如總統競選宣言（佢曾兩度競逐共和黨總統候選人提名，俱敗陣）；又話美國人好打官司，係美國律師嘅錯，皆因呢啲瘋狂律師（Crazylawers）成日到處挑撥人告大企業索償，搞到商家每年損失慘重。福布斯講到咬牙切齒，講到美國好可能對伊拉克開戰，忽然靈機一動，話最好送晒班律師去伊拉克。
據悉，佢下午三時十五分與特首董建華會面半小時，談經濟形勢。小休後，福布斯傍晚出席由恒隆主席陳啟宗專登為佢搞嘅大型晚會，與本港商界猛人聚會。咁嘅行程，少啲精神都唔得。
（圖）福布斯在香港美商會的午餐會演講，十分幽默。
傳真︰2623-9278
電郵︰