早前，再度打入香港市場嘅新一代歐寶Corsa，繼五門自動波版之後，最近代理又引入埋帶有小跑車氣息嘅三門手波型號；除備有獨特見個性嘅車廂色調配襯外，特別換裝嘅四輪跑車合金胎軨同Racing白表板設計，重倍添有多一份活力㗎！
記者：陳偉林
攝影：陳偉強
ImageGirl：王穎
新車售價：$124,800（手波版）
車輛提供：福方汽車（29888080）
向以着重汽車動力學設計嘅德國歐寶車廠，給新一代Corsa有渾圓車體結構外，重錄得同級至低嘅Cd0.32風阻系數，令行車倍感暢順之餘，難得呢部小車子重兼顧有高安全性，取得歐洲嚴格嘅EuroNCAP四星評級㖭！然而，可人嘅橢圓鵝蛋車燈及直立式尾燈編排，重表現有一份個人嘅獨特性㗎！
呢兩款三門版Corsa備有特別嘅車廂色調配襯，藍色表現出暖意之餘，鮮紅色調明顯透現有一份跑意來。空間闊落予人愜意感外，電窗、門邊電鏡及原廠電天窗自然不在話下，兼且重有原廠連遙控嘅高級音響同冷氣組合，唔少得重有行車電腦顯示，以及前排雙安全氣袋裝備㖭！
新引入嘅三門版Corsa，沿用一台低轉有好表現嘅1.4公升直4DOHC輔Ecotec引擎組合，匹配5前速手波裝置，令起跑加速更見勁度同駕駛樂趣㗎！而歐式底盤及懸掛結構，加上增大嘅15吋胎軨組合，重畀到人有一份高循迹性嘅體驗呢！