美國資深精神病學家，認為數以百萬計的家庭糾紛的出現，是因為家人其實已患上「關係障礙症」（relationaldisorder）。求診者基本健康，但他們跟家人關係「有病」。
關係障礙症，雖然是未被確認的試點新發現，卻足以讓我們對「基本健康但部份關係有病」的家人了解深一點。
實情不單家人之間容易關係障礙，朋友、夫妻、同事、主僕、官民之間的關係更複雜、更密集、更帶菌，發病率極高。關係障礙重病重症的患者，表裏不一，外人很難捉摸，醫師亦有可能被瞞過，以為閣下好人好者，心率均稱，面相亦不似神童輝，斷估都無可能關係失衡。除非，咦，乜閣下咁面善，原來係靚字頭官車接送出入政府總部的阿乜誰。難怪難怪，心口有個勇字，額頭發出紫紅青光，唔使把脈都估到，七成是disorder末期病患人士。
講到明是失衡失控，官民關係，可想而知。高層抓權的人，跟不同勢力人士千絲萬縷的關係，屬於低透明度的秘密，市民未能摸底，但一旦這種關係出現病變，受害的，是普羅百姓。高層關係，爆完大鑊以後，就算公開「互片」，都是做戲咁做，更凸顯出，這批下下叫你支持「團隊精神」的人，他們的神經正常，但智力嚴重障礙，被迫跟這些人發生關係，你願意嗎？你說既然人在扒龍舟，所以會無奈sayyes？我的媽，你真係有病。