王子都唔係第一次喺度講行貨保養條例，存在着灰色地帶，呢啲問題重係4大名牌個個都有份㖭。王子有個朋友手機自動熄機，接鍵失靈，於是拎去維修中心CheckCheck，點知佢哋一口咬定話你部機入水。王子唔知係唔係曾經有客博懵，但係我個朋友真係無跌無撞無入水，佢地就話人入咗水，真係口同鼻拗，激到我朋友紮紮跳。
據我王子估計，根本就係部機自動受潮，特別近排大熱天時，手汗、出入冷氣地方、口水，樣樣都會導致手機受潮。其實各大手機商點解唔好好檢討下，係唔係自己啲機設計有問題呢？如果部機自動受潮，就屈啲客話入水，啲客幾千銀買部機，有事要入廠重要俾維修中心屈，學劉德華話齋，今時今日，咁嘅服務態度唔得㗎。