我求大俠以為淨係拜仁教練希斯菲特先識得放流電，點知曼聯領隊費格遜都係呢方面嘅高手，重將英格蘭領隊艾歷臣玩殘。
費格遜喺上個禮拜二，先至話史高斯因足踝受傷而要唞半個月，搞到艾歷臣唔敢選史高斯，踢禮拜六英格蘭對葡萄牙場友賽。點知轉個頭，老費喺前晚場聯賽又放史高斯落場，重要畀佢踢正選。
咁都未算，老費之後又話碧咸喺嗰場波整親小腿，禮拜六踢唔到，於是就幫佢退隊。雖然艾歷臣事後表示唔會補選球員頂碧咸個位，但係就俾老費玩死。事關佢冇咗史高斯、碧咸同戴亞，淨係度個中場陣都有排諗。
查實𠵱家曼聯有加利尼維利、堅尼同布朗養緊傷，加上季初又表現麻麻，老費當然唔想旗下啲球員踢埋啲無關痛癢嘅友賽，所以就借勢唔畀班球員打國際賽囉。
碧咸前晚喺對米杜士堡場英超聯，着住印有細仔羅密歐（Romeo）個英文名嘅波砵比賽；而雖然佢最後都幫曼聯贏咗一比○，但係自己就拉傷咗左邊小腿肌肉，要休息一個星期，搞到喺禮拜六重幫唔到英格蘭踢對葡萄牙場友賽。咁樣睇嚟，羅密歐似乎唔係好旺碧咸喎。
拜仁慕尼黑日前鬧利華古遜正一奸商，話對方唔講清楚畀佢哋聽，原來薛羅拔圖成季都要食止痛藥。但計我求大俠話，拜仁買咗件次貨，怪就怪佢哋交易時唔驗清楚。老實講，拜仁係間規模咁大嘅球會，重要有神醫禾花夫壓陣，咁都check唔到薛羅拔圖係百病纏身，認真唔抵可憐。
巴塞同𠵱家效力士砵亭嘅查度簽咗份合約前加盟協議書，相信可以年尾過檔，而且一再強調佢哋成個暑假一直都搵緊前鋒，又話如果唔係教練雲高爾反對，早就搵咗朗拿度回巢……我求大俠相信最唔開心係古華特，而佢果然亦對收購查度一事好冷淡，好唔高興，無他，佢知道自己危危乎嘞，呢啲就係佢成日做敗家仔嘅結果，與人無尤。
噚日英國嘅魯錫斯基喺美國公開賽輸咗畀森柏斯之後，好冇風度咁話呢位老將速度「慢半拍」，好彩森柏斯爭氣，第二日立即再勝赫斯呢位勁敵，證明自己依然咁掂，最抵死係佢反駁魯錫斯基嘅說話，佢話：「對住佢（魯錫斯基）我唔需要快半拍喎。」哈！估唔到呢位美國老將口齒咁伶俐。