八方較早時提過禹銘投資想收購中巴，佢哋「兩老」馮永祥馮耀輝有心攞景，安排本周六喺中巴有業權嘅北角成坤廣場一家酒樓搞股東答問大會，同股東傾將中巴拆骨，擺明有踩場意味；如果中巴創辦人顏成坤先生泉下有知，相信會激到彈起。
不過該酒樓前日突然話唔做禹銘生意。據說酒樓負責人同禹銘講要維修冷氣；但早唔整遲唔整，點解揀正禮拜六最多客人先整呢？於是八方特地撥個輪去嗰間酒樓問問，有位經理就話嗰日冇工程，至於點解單方面退訂，佢就話係酒樓高層決定。
咁中巴又有冇從中施壓，迫間酒樓退訂？中巴發言人話佢哋冇做過嘢，亦唔知點解禹銘個場被取消，至於顏氏三姐弟會否赴會，則要睇情形而定。禹銘最終揀咗上環信德中心嘅皇上皇酒樓開會，時間就延後一星期，即下星期六（九月十四日），睇吓今次又會唔會再有阻滯。
傳真︰2623-9278
電郵︰