小初噚日喺中環剪髮，撞見靚仔經紀，問佢呢排有乜搞作？佢話有個客仔炒緊新醫藥（8085），叫做有多少生意做，如果唔係都唔知使唔使乞米。使唔使講到咁淒涼呀？佢就話珍珠都無咁真。
新醫藥自上市以來，鑊氣一直好旺盛，由幾毫子一路炒到上去，最高升至1.30元，就算家陣個市咁靜，隻股噚日都收1.10元，成交金額幾乎日日過千萬元，睇嚟炒作成本都相當高。
不過，睇番隻股嘅業績，又唔算特別正斗，上個月佢公布截至2002年6月底止首季業績，盈利只得50.8萬元，較舊年同期倒退42.6%。究竟隻股以乜理由炒作先？
靚仔經紀話，聽個客講隻股想批股集資，所以先至頂到咁行，但好似至今仍未搵到有人肯幫手批。
靚仔經紀臨走前，向小初推介華潤置地（1109），佢話隻股將於本周五公布中期業績，聽講表現唔錯，所以已經有外資大行推介買入。
慕容小初