市道不景，搵食艱難。
被裁的校巴司機、失業的地盤佬、剛畢業的雙失少女齊齊見報HardSell自己，望得僱主青睞，年關難過年年過，各位僱主能否伸出援手，助他們度過難關？
記者：陳漢榮
攝影：黃子偉、伍慶泉、陳漢榮
鳴謝：UniversialStar
推介一
蔣國端 62歲
學歷：初中
工作經驗：20年職業司機、推銷員、專線小巴司機
一技之長：1963年領駕駛執照（車牌類別1、2、3、4、5、6、22），1996年領國內駕駛執照，可駕駛私家車、小型貨車、校巴、電單車
子女失業復出為生計
本來我已經退休，點知啲仔女俾人炒魷，生活頓成問題。早前久休復出重操故業，諗住好好彩搵到份校巴司機，點知做唔夠兩個月又俾人炒，估唔到𠵱家搵食真係咁艱難！雖然我年紀大啲，但勝在揸車夠穩陣，小朋友坐我車，百分百安全㗎，希望有人請我啦。
第一志願：小型校巴司機
第二志願：送薄餅電單車司機
第三志願：中港小型車司機
要求待遇：面議，萬事有商量，唔掂傾到掂
1.道路認識：
隨意翻開地圖，問5條街道之所在，結果5中4，80分！
2.考體力：
蔣先生至怕人嫌佢老，即席玩掌上壓以示佢有心有力，2分鐘操盡有16下，OK啦。
3.考眼力：
距離超過20架私家車，蚊型招牌上面有「啟智研習社」五個字，連下面嘅電話號碼，蔣先生望一眼就讀得出，滿分。
4.交通安全：
記者充當乘客，在土瓜灣附近街道兜兩轉，放工時段人車爭路，蔣先生不敢左穿右插，速度唔算快，但坐佢車絕對安心。
10年經驗小巴司機李先生：「有20年駕車經驗已經係優勝之處，但最緊要Sell到四個字──老而彌堅！畀僱主Feel到你係一個安全駕駛者，見工嗰時要執正啲，唔好烏眉瞌睡，要同後生仔一樣咁有活力。」
推介二
方結瑩（Kat） 17歲
學歷：中五
工作經驗：業餘模特兒
一技之長：打籃球、做衫、化妝、一般電腦常識
會考雖1分積極記性好
我會考得1分，但唔代表我無用，我之前做過雜誌ImageGirl、業餘攝影發燒友嘅Model，有一定嘅模特兒經驗，擺Pose駕輕就熟，為人積極、大膽，記性又好，背對白難我唔到。有機會行天橋或者拍戲的話，一定唔會怕醜。
第一志願：模特兒
第二志願：演員
第三志願：機場地勤
要求待遇：$6000，面議亦可
1.擺Pose：
不用攝影哥哥嘥口水，都曉擺唔同Pose，佢話回眸一笑個Pose最掂。
2.身體柔軟度：
坐低，兩腳向橫一伸，輕輕俯身，「大」字馬話都無咁易，證明腰肢柔軟。
3.考膽識：
要求Kat隨街搵陌生人合照，居然一擊即中，不用30秒，一位哥哥仔肯企定定同佢影張靚相。
4.做表情：
Kat尚算表情豐富，除咗喊唔出之外，一般嘅表情都應付自如，可以收貨。
模特兒公司UniversialStar經理Sunny：「做Model先睇五官，自備一輯至索嘅相；身體柔軟度亦好重要，面試前最好多做拗腰、拉筋之類嘅柔軟體操，以應付高難度Pose；預備定5分鐘自我介紹，無謂俾人問到口啞啞；睇多啲時裝雜誌，了解吓行情，等人Feel到你上嚟見工唔係鬧着玩，有誠意喺呢行發展。」
推介三
LamTin 38歲
學歷：中三
工作經驗：裝修判頭、髹漆中工、運輸工人、家具裝嵌、打雜
一技之長：捱得做得，用之不盡的精力
肯做肯捱爽手有交帶
以前好景做判頭，𠵱家失業無工開，馬死落地行，打雜都做呀！我肯做肯捱，粗重工夫瓣瓣掂；我力大無窮，擔擔抬抬無問題；我做事爽手，有交帶，我……萬事俱備，只欠一份工。
第一志願：地盤工人
第二志願：裝修工人
第三志願：家具裝嵌
要求待遇：面議，長工最好，散工唔拘
1.考臂力：
抽起每條差不多30磅重的鐵欄不難，但同時抽起兩條鐵欄急步走30碼，面不紅氣不喘，之後再企定定擺Pose影相，少啲臂力都唔掂。
2.手腳夠快：
大約四分一籃球場咁上下面積，布滿泥沙、石頭、磚頭、垃圾，不用10分鐘清理完畢，做事果然快手快腳。
3.考體格：
LamTin稍稍一谷手瓜起𦟌，六吋高老鼠仔識彈識跳，體格優良。
14年經驗判頭雷先生：「市道唔好，𠵱家地盤佬搵工好難，但千祈唔好等運到，主動聯絡以前嘅判頭，因為呢行多數靠熟人介紹。識用電腦始終有着數，因為呢行差不多八成人係電腦盲，你識用電腦出份報價單，僱主請你嘅機會都會大啲。」
資料來源：勞工處
《蘋果》幫你搵工
失業唔使愁，《蘋果》可以幫你搵工，只要你肯出鏡兼接受訪問，一經刊登，你分分鐘會被未來僱主睇中！來信請寄香港將軍澳工業邨西駿盈街八號《蘋果日報》副刊「我要一份工」收
傳真：27420542
電郵：