香港車市吹淡風，想引起買家嘅注目，除咗要做吓Carshow博有多啲生客睇車外，重要搞吓另類宣傳，博班車迷留有深刻印象嘛！就好似愛快咁，早前亞Mark提過話佢哋搵咗型男方中信幫手，免費提供座駕畀佢日常代步，唔單止可以吸引鮮有入Showroom睇車嘅街外客之餘，分分鐘重可以惹起各大報章雜誌嘅娛記留意，登埋出嚟重好過畀錢宣傳㗎！據知給方中信度身訂做嘅愛快156SportWagon，重會響今個周末嘅車展中出現㖭！除包圍以外，重換裝有大口徑迫力碟同六活塞制動卡鉗㗎！你都咪話唔犀利。另外，聞得愛快代理最近重同澳門格蘭披治賽會簽咗兩年合約，今、明兩屆澳門格蘭披治大賽車，佢哋重會清一色提供最新、最快兼最有型嘅156GTA車隊，屆時車迷就可以看到一身鮮紅色嘅AlfaRomeo，響賽道上穿梭嘅英姿㖭！唔講唔知，明年係澳門格蘭披治大賽嘅50周年，賽會為咗隆重其事，重會連續兩星期有賽事舉行，賽車迷就真係可以大飽眼福喇！