周二晚美股跌勢出乎意料大，杜指及納指大跌4%，但正如趙飛雲前日所講，在美股假期內，恒指已跌251點，預先反映跌勢，所以噚日恒指跌至9629（跌161點）已經跌唔落。大戶上午在9650附近收夠貨後，午市大舉挾淡，恒指倒升29點收市，收9820。
趙飛雲隻恒指Put輪9287確係沽早咗，如果噚日早市才沽，可以執多萬幾蚊，但杜指周二晚若只跌200點以內，港股噚日開市可能已挾上，所以計落部署並冇錯。恒指噚日午市由地產股帶動反彈，其實前日已見恒地（012）率先反彈1.4%，當時以為係公司增持或回購。噚日市場傳出政府居屋政策有變，將有利於樓市，港股短期若出現反彈，可能會由地產股帶動。
目前地產股中以恒地走勢較佳，股價及9RSI均升至7月延伸至今降軌阻力，一旦突破，將上試8月6日下跌裂口28.30至28.70元阻力。恒地Call輪可選擇不多，9473幾乎係唯一選擇，隻輪03年3月10日到期，行使價26.88元，溢價12.4%，槓桿率11.9倍，數據尚算合理。若恒地升破降軌阻力，可伺機炒一轉超短線，但見好即收，因港股整體形勢仍偏淡。
恒指短期反彈阻力5日線（現處9923），升破則可進一步挑戰10000-10100，但估計不易突破，目前策略仍是趁反彈收集Put輪為主，除非出現重大變數。
趙飛雲