隔晚杜指大散3嚿半，港股呢勻重唔雞毛鴨血？個市就係唔易俾你估中，恒指由急跌161點變倒升29點。最低之時，恒指9629，同上月初最低9633比較，相差好微，若然外圍市唔係太離譜，港股應已暫時試底成功。
中移動（941）由跌55仙變成冇跌，又有幾件大藍籌有大買盤撐住，人心轉番定啲。地產股做反彈先鋒，另外有地產成份嘅太A（019），亦都神勇，上晝收34元，下晝殺上34.90元，升60仙。太A因為晏晝升得快趣，太A熱門Call輪9475未有跟貼，收47.5仙，只升1%，若然跟貼，升1成冇乜走雞，呢件值得捧場。
近排股市波動大，恒指窩輪成交金額成日排頭位，講波幅當然比唔上好多藍籌輪。揸咗恒指Put輪嘅，應該心足，有錢賺落咗袋先。恒指Call輪值得博反彈，最正路嘅對象係9406同9408，非常容易買賣。大藍籌中，中海油（883）跌30仙，滙豐（005）唔見50仙。若然再跌多啲，可以吼吓相關Call輪。中海油輪買9361，現價15.2仙，明年中到期，溢價4.5%，槓桿率10.5倍。滙豐輪揀9395，現價44仙，明年1月到期，溢價8.0%，槓桿率19.5倍。
章 盛