美股大跌4%，港股竟然可以先跌後企穩，倒升29點，收9820，成交達59億元，真係上帝保佑。市場傳出有中資入市，為中國電信上市造勢，不過呢啲傳聞唔係好可信。地產股走勢最佳，主要因為市場憧憬政府會再加大救市力度，據講其中一招係將居屋售予地產商。阿虎十分費解，唔知會有乜作用，亦唔明地產商買下居屋有何用。
潘蘇通向松日控股﹙283﹚提出之全面收購建議已於上月底截止，其持股量增至68.24%。雖然大股東話短期內唔會將電子業務注入，但據聞有人都幾心急想進行注資，無奈近期股市氣氛較差，特別係細價股，所以好難做嘢。大股東今次收購松日是向英皇國際融資來支付，聽講松日可能會配股集資向大股東收購資產，讓大股東套現償還有關融資。松日在國內有一定知名度，一旦落實注資，松日將變成一隻不折不扣嘅民企股。
市場又傳出太平協和（438）私有化，每股作價約0.80元，較噚日收市價0.425元有溢價近倍。
太協耐唔耐都會傳出私有化，但傳完之後好耐都冇動作跟尾，跟炒好難捉路。太協每股資產淨值有1.50元，若能以每股0.80元成功私有化，其實汪生都幾和味，而小股東亦可以近倍溢價沽貨，其實算唔錯，近期市況咁淡，小股東真係難得有套現機會。
盈富基金（2800）下月又推出發售，以現時港股每日成交50億元來講，新一季可以出售60億元。不過外滙基金投資公司暫時重未有風吹出來，似乎重要睇吓港股形勢，港府雖好想在兩季內清晒貨，睇嚟唔容易。
阿 虎