廣播處前處長張敏儀總是閒不了，從前線退下後仍十分活躍，更不斷出外遊玩，非常happy。最近佢重忽然技癢，同《亞洲週刊》做咗個獨家專訪，訪問咗日本首相小泉純一郎。啊！原來係小泉先生，唔怪得張大姐肯親自出馬，咁大陣仗啦。
八方聽聞，小泉非常畀面，喺出發去北韓訪問前接受大姐訪問，聽講今次重係小泉第一個亞洲雜誌嘅訪問㖭。既然咁威水，八方當然想知總編輯邱立本點解搵到大姐出馬？邱先生話，大姐喺日本嘅網絡好好，大家又係好朋友，所以咪請到大姐出山。本周刊今晚就有得買，咁究竟有乜勁料爆呢？邱生當然賣吓關子唔講咁多，總之多數係同外交有關啦。
邱生又以商業秘密為由，拒絕話畀八方聽大姐收幾多稿費，不過有知情人士踢爆，大姐今次係做義工，冇錢落袋，重係親自寫稿㖭。
講開張大姐，大家仍然最關心佢嘅去向，其實大家唔使同大姐急，原來佢重係放假期間，要到年底先至真正回復自由身。TVB嘅方小姐，我哋嘅Jimmy先生、tom.com嘅周小姐等老闆都唔使心急，目前重未知花落誰家。
傳真︰2623-9278
電郵︰