賓架G唔算英俊，但生咗一位靚女，靚得嚟又有料噃，就讀於長春藤大學，讀化學工程，望真啲佢嬌滴滴，真係唔多似係工程師。望真佢，並非左丁山對靚女大興趣，皆因此日左丁山請公關大姐大班夥計食飯，靚女G就坐在對面，佢放暑假返嚟香港打暑期工，跟公關大姐大學嘢，學得非常開心。讀工程而對公關工作有興趣，似有啲唔「那更」，但諗起工業L位千金，去美國名校讀建築，畢業之後返嚟放假，偶然機會之下，到公關公司做無償暑期工，之後就唔再返去讀碩士考建築師牌咯，𠵱家喺公關公司做得好過癮，幾乎晚晚開工到十點㖭。
工業L雖然培養女兒做建築師，但佢要做公關，亦唔反對。將來賓架G位千金或者走同一途徑亦唔定。大姐大亦請咗一位準律師（暑假後讀PCCL）做暑期工。呢位準律師讀大學三年，每年暑假都到律師樓做工，經佢位mentor介紹，學做公關，但兩個星期後就鬆人，好似冇乜興趣喎，以畢業後收入計，準律師已經與大律師樓簽約，月薪三萬幾，明年上工，好過做公關多多聲，香港學生睇錢多過睇興趣，好務實嘅。
現在已經放完暑假，啲老友仔女紛紛上飛機鬆人（唔知點解，佢哋好少在本港讀書），老餅回復二人世界，成間屋都靜晒，於是賓架G打電話嚟：「喂，周末好似有個投資講座……」學生backtoschool，家長就backtonormal。