發展商賣樓軟硬兼施，除以低價硬銷樓盤外，亦明白到買家買樓不單止買一個單位咁簡單，亦會講求配套。新地賣樓部高層，近日馬不停蹄宣傳小欖愛琴海岸。
個盤有鄰近黃金海岸嘅地利，同時吸取珀麗灣私家遊艇作賣點的噱頭，於是提供「愛琴海岸船隊」服務，提供三艘船畀住戶租用，包括58呎長的遊艇，可容納30人，另一艘係45呎長帆船，同埋一隻可容納8人嘅快艇。
新地市務總監林寶彤就話，該船隊旨在為住戶提供吹風看海的機會。
此外，屋苑管理公司會同香港帆船協會會長合作，提供課程畀住客參加，費用全免，但住戶要負責油錢及食物費用，估計最低消費約2000蚊。
趁昨日天氣良好，新地賣樓部要員同傳媒出海，率先體驗帆船之旅。賣樓大臣全部都爭住坐隻帆船而唔揀遊艇，可能「坐艇」唔好意頭啩！
聽聞藝人宮雪花將手上最後一個灣仔會景閣單位蝕賣，28樓11室，面積829方呎，成交價420萬，呎價5066蚊，都算唔錯。但比買入價1450萬元要蝕好多。
宮小姐喺前年都蝕賣咗42樓11室，面積973方呎，成交價768萬。
呢兩個單位喺97年高峯期高價買入嘅物業，總共蝕咗1742萬。
地鐵將軍澳支線上個月通車，市場憧憬區內新盤會乘利好消息推出，但等到最近，太古地產嘅維景灣畔至有搞作。發展商喺現樓搭咗個示範單位，今日請傳媒參觀，除咗介紹示範單位嘅設計意念，亦會講吓個盤嘅最新資訊。蘭西諗，係咪累積銷售數字同新一輪開售安排呢？將軍澳其實重有兩個樓盤都可以隨時開售，就係將軍澳中心同將軍澳廣場。
另外，香港興業嘅愉景灣海澄湖畔二段，今日會披露樓盤最新動向，並且請記者坐直升機，在空中俯瞰樓盤，令大家有新體驗。但蘭西最關心係幾時開盤。
發展商8月初喺新加坡已公布意向呎價。另外，樓盤7月份搞咗個「1001夜越洋浪漫之旅」，得獎名單唔知係咪今日公布呢？
近排一手樓市新聞，來來去去都係得一兩個盤，其他發展商開始有搞作，讀者都無咁悶。
新地與代理聯手催谷小欖愛琴海岸，各代理不惜自掏腰包送大禮，務求吸引買家入市。香港置業日前喺屯門黃金海岸搞咗個誓師大會，有成300幾個員工出席，董事胡日發喺會上話，為答謝買家，經該行購買愛琴海岸嘅頭三個買家，會獲贈鑽石。另外，同場還加演「誓師口號創作比賽」。
蘭西講咗好多次，一手樓價平又多優惠，對二手樓構成沉重壓力，搞到二手樓價屢見新低。究竟有幾嚴重，聽完古仔就知嘞。
話說有個代理同個豪宅業主傾開樓市，話二手樓冇得同一手爭，一定要劈價先去到貨，業主就問代理，佢個單位要平成點先賣得出，代理唔知點答，因為講得高未必賣得出，講得低又令個客冇晒心機。一手樓市旺，但二手就靜到拍烏蠅，想唔認係兩極化都唔得。
新地馬灣珀麗灣一日銷逾千伙，創出紀錄，內地樓盤都唔輸蝕，番禺祈福新邨海晴居，7月開售以來，賣出千五個單位，粗略計算，平均每日都賣二十幾伙。發展商今個月推出新優惠，定金僅一萬蚊，八成樓價七日內做按揭，其餘兩成入伙後分五年按月攤還。
荃灣登發街富裕樓地下18號舖，地下及閣樓各五百方呎，啱啱以六百萬易手，聽落冇乜特別，原來呢個舖位曾經由豪宅大王建箂集團主席秦錦釗持有，前年被銀主收回拍賣，並以六百六十八萬元售出，及至近日，業主微蝕六十八萬元將單位再轉售，但相比秦生94年嘅八百萬入貨價，算蝕得小。
中原潘志明透露，個舖位由上市公司卓健亞洲旗下卓健醫務所租用，每月五萬元，租期至明年五月。買家有一分回報。回報咁高，業主都要蝕賣，聽講話係有意換一啲過千萬元嘅舖位。
蘭西
電郵地址：