韓國起亞車廠自納入現代旗下後，近期正秣馬厲兵，積極拓展歐、亞汽車市場。而當中最車氣急升，並備受北美及歐洲車迷追捧嘅Sorento，更可謂突破傳統嘅高性能豪華SUV車款，大有媲美日本豐田Harrier（凌志RX300）同直逼平治M-Class之勢㗎！據知香港代理於年底前，更會率先引入Sorento頂級3.5V6型號，有興趣嘅朋友就真係要拭目以待喇！
特約記者：張以中
新車售價：約港幣20萬起
查詢：起亞香港（27609933）
車廂鋪排可謂豪華至極，除前後兩排高級皮椅剪裁貼身具承托感外，後排重可以左右獨立收摺，令尾廂空間有幾近倍增！除桃木裝飾外，原廠一體式音響同恒溫冷氣，重好有一份High-tech味道；當然唔少得重有隔熱電窗、門邊電鏡同電天窗啦！
Sorento頂級3.5V6DOHC偈，馬力197ps/5500rpm，而扭力響3000rpm低轉下，可有30.1kgm高扭力輸出，匹配恒式四驅，重有電子高扭力同兩驅選擇，攀山涉水亦全沒有難度。前雙搖臂後五連桿懸掛組合，加上四輪碟式制動同ABS，大有收放自如嘅表現㗎！據知新車重有一台符合Euro3規格嘅2.5公升柴油引擎，若然想慳油環保的話，大可向代理查詢同落Order㗎！
雖然新車剛響歐洲面世，但起亞車廠經已替Sorento，準備咗一系列RV配件，既有車頭防撞架、又有兩邊車身門枕、車頂行李架同旅行箱等裝備，又真係好齊全噃！