葉璇加盟無綫以嚟工作不斷，但同樣佢嘅是是非非都唔少，馮仁昭聽講早排佢同吳鎮宇、胡杏兒同陳慧珊去日本拍電視劇《衝上雲霄》嘅時候，就猛咁四圍放電。
嗰次葉璇佢哋入住日本嘅民宿，鎮宇拍晒佢嘅戲份，準備第二日先返嚟香港，臨走前一晚班幕前幕後工作人員就喺民宿樓下間食肆同鎮宇食飯。
原先葉璇着住件露臍裝，點知食食吓佢忽然返上房換咗件lowcut，當大家竊竊私語之際，佢又再返上房換咗件大V嘅低胸衫，好似做fashionshow咁，當然唔少得嘅係佢猛向鎮宇放電啦！可惜鎮宇心有所屬，葉璇點努力佢都唔過電。
不過，馮仁昭聽聞劇中有唔少男演員俾葉璇電暈，每次佢哋同葉璇同場拍戲嗰陣，啲男演員都會「囉囉孿」。馮仁昭重記得早排有人話胡杏兒拍《衝上雲霄》嘅時候四圍放電，唔通有人誤把馮京作馬涼？
陳見飛入娛樂圈幾個月，成日都精神緊張，瞓唔安但係就好想食，可惜佢要減肥，所以每餐都只可以食菜，朝早就可以食半碗飯。
陳見飛除咗冇啖好食之外，重緊張到停經，本來女仔人家突然停經已經好驚，點知佢老竇陳澤民重同個女講笑，問佢停經係咪因為有咗，提番起件事，陳見飛好尷尬咁話：「Daddy同我去睇咗四次中醫就好番，我知道唱片公司啲同事都等緊，嚟咗真係好開心，要慶祝。」真係誇張，一個歌手停經，都可以成間公司為佢擔心。
任賢齊噚日喺港台接受訪問，佢大爆自己曾經裸泳，佢話：「拍《夏日的麼麼茶》嘅時候去過裸泳。」問佢係咪同鄭秀文一齊？佢話：「唔係呀！點會喎，唔好亂講呀！我同阿牛去咋！」
不過小齊唔係第一次裸泳，佢話：「讀書嘅時候都有試過！裸泳個感覺都幾好！啲水走遍你全身。」小齊最近都係忙為電影同唱片宣傳，要港台兩邊走，佢好辛苦咁講：「真係好怕坐飛機，最慘係做完嘢好夜又冇嘢食，第二朝又要好早起身坐飛機。」
王秀琳噚日接受新城電台訪問，佢透露日前因放狗仆親，整傷咗下巴。貪靚嘅佢噚日買咗一副千五蚊嘅平光鏡同套咗啲假牙，佢話：「我冇近視，不過由細到大都鍾意戴眼鏡，見到個朋友戴副眼鏡好靚，咪買囉！而我啲牙都冇乜事，只係覺得我上鏡啲牙好細又薄。但係我絕對唔會隆胸，反而想胸部可以細啲，因為我背脊薄，細啲着衫會好睇。」Mango近日同無綫導演李和權喺旺角一間賣汽車用品嘅店舖買裝飾品，但佢話大家唔係拍拖。
有間娛樂公司老闆，為咗巴結城中富豪，成日介紹旗下嘅藝人畀富豪認識，早排佢就介紹咗個女歌手畀富豪識，見女歌手同富豪都幾啱傾，佢就即時提議女歌手同富豪上契，做富豪個契細妹，最後有冇正式上契馮仁昭就唔清楚，不過娛樂公司老闆就因為咁，同個富豪熟落咗。
香港經濟低迷，好多港人都轉投內地搵錢，好似林文龍咁都唔例外。早前佢應邀喺廣州為時代花園拍樓盤廣告，廣告推出後試過一日賣出十四個單位，證明林文龍喺內地都幾受歡迎。樓盤老闆重打算送一個單位畀林文龍，講到今次嘅酬勞都唔錯，林文龍話：「都有六位數字，相當滿意。」
呢輪有個靚仔歌手風頭都幾勁，不過有人同馮仁昭講，話呢個後生仔都幾反骨，話說佢同女歌手拍拖時，初時係幾甜蜜，後來靚仔歌手去寶島拍戲識咗另外一個女星，之後不斷講大話呃歌手女友，冇幾耐就飛埋女歌手。如果靚仔歌手唔係同知名度比佢高嘅女歌手拍拖，相信佢都冇咁多人認識佢，不過女歌手對佢就恨之入骨，幾乎人前人後都鬧靚仔歌手。
以前白龍王好神秘，一般人都只係聽過佢嘅大名，好少有機會見佢，但近幾年就好多雜誌報章都刊登白龍王嘅相，早排佢重嚟香港幫電影《無間道》祈福。
今日港姐冠軍林敏俐、亞軍左慧琪、季軍胡家惠同埋嘉碧儀、蔡潔雯會出發去泰國做親善訪問，其中最特別嘅行程，就係去拜見白龍王，真係好奇怪，去做親善訪問點解要去見白龍王呢？唔通佢哋要白龍王指點迷津？
有個嚟自東南亞嘅女星，本來個樣都唔差，身材又正，但係呢幾年就不停去整容。馮仁昭早排見到佢，對眼大咗、個鼻高咗連嘴唇都整厚埋，聽講話呢啲叫做性感。不過馮仁昭就覺得佢個樣好鬼假，可能就係因為撈得唔掂，先至諗住落重包裝，但係效果就適得其反。