歐洲股市連續兩日下挫，美股噚晚復市相信會跟隨下挫，歐美投資者似對經濟復甦信心進一步轉壞，增加基金贖回壓力，港股今日表現絕對難以樂觀，守得住9600都算係上帝保祐。
自從聯交所發出細價股除牌諮詢文件後，細價股再冇乜人玩，不少公司則自動合併股份，不過合併咗唔等於股價唔會再跌，反而會增加下跌空間。噚日金禾國際（2966）股份合併生效後，股價即大跌62%，收7.6仙。早前合併嘅人人控股（2964）合併後累計跌幅73.6%，噚日收6.6仙。金禾10合1，人人25合1，但合併完都即時跌到變番仙士股，跌幅重厲害過聯交所發出除牌諮詢文件嗰陣時，而且以現時走勢看來，隨時好快又變成跌無可跌嘅1仙股。有時諗諗吓，忍一時之痛將所有質素欠佳嘅股份除牌，未嘗不是一件好事。
電盈（008）噚日傳出供股，其實有關電盈供股嘅傳聞都傳咗兩三年，公司次次都否認。電盈債台高築，在在需財就係人都知，但銀行及機構投資者對電訊企業貸款及債券有所顧忌，電盈若要集資，投資銀行必然會建議供股，亦惟有這樣才可加強銀行及機構投資者對電盈償債能力嘅信心，若銀行再施加壓力，電盈距離供股之期應該不遠。高盛直頭叫客戶等業績報告公布後，所有利淡消息浮現才可吸納電盈，似乎暗示電盈公布嘅業績可能有啲嘢。
雖然李超人入市支持長和系，不過歐洲傳出德國政府擬沽出德國電訊，可能會令和黃（013）手持嘅德國電訊帳面值進一步下挫，搞到和黃腳仔軟。另外值得注意係和黃手上嘅德國電訊及Vodafone市值下降，重未反映在損益表內。
阿虎