上次到美麗華酒店參加記者會，上到Penthouse就見到電視台嘅Twins招待會，娛樂記者齊集，左丁山以為摸錯門口，睇清楚個牌，先知道另一個記者會喺隔籬舉行，不過Twins正吃香，俾佢哋搶咗注意力去啫。
有時都唔明，呢兩位瘦削俏姑娘有乜吸引力，令唔少少女追住佢哋大叫大喊，但任何時刻，市場總是對的，Twins正好把握時機賺錢，既然佢哋咁受歡迎，正好乘機做善事，為病人造福，福有攸歸之餘，可以紅耐啲。
「程思遠（中國──國際）肝炎研究基金」為中國肝炎病人醫療籌款，發起一個「世代無肝炎」行動，Twins喺九月十三及十四日第一次到紅磡體育館舉行演唱會，部份門券收入撥捐呢個「世代無肝炎行動」，為中國貧困地區嘅初生嬰兒注射乙型肝炎疫苗，大家去聽歌兼做善事，一舉兩得。
據公關靚女伊話，中國目前每年有超過五百萬名新生嬰兒，因窮困無助，冇機會接受乙型肝炎疫苗注射，好易染上肝炎，一代一代咁傳落去，而中國有百分之十五嘅人係乙型肝炎帶菌者，咪話唔得人驚。賓架R幾年前到大陸傾生意，與內地人互相「隊」酒，溝酒互飲，返嚟香港就惹上肝炎入院，佢諗諗吓，覺得係在四川溝酒惹禍，病咗一場之後，好番，現在堅決唔與任何人飲勝，溝酒更加反面。原來中國咁多人有肝炎，上去應酬，千祈要注意。