個市繼續唔妥，恒指又跌106點。跌市中，長實（001）因為李老闆增持股票同買入高息票據，收55.25元，有1格升幅。
長實最低54.50元，啱啱同上月中低位相同，喺超人買貨效應支撐下，如果外圍唔再曳落去，長實有可能見短期雙底。想搵食，可以細細注敲吓長實Call輪，對象係一對最多成交嘅，即係9517同9515，兩隻輪條款差唔多，9517靚一條馬鬚。
長實54.50元如果守唔住嘅話，又點呢？跌落去911事件之後低位51.50元嘅機會存在。亦可𠵱家忍吓手，等長實跌到呢個位之時先至諗吓Call輪9517同9515，喺長實見51.50元之時買Call輪，風險低好多，但亦有可能失咗搵銀機會，如果長實𠵱家就反彈嘅話。
大超人買長實，小超人買和黃（013）高息票據。和黃收51.50元，跌25仙，冇長實咁叻。小超人效應，點都冇大超人咁大，博李系窩輪，長實窩輪好過和黃窩輪，3G發展拖累和黃嘅陰影揮之不去。真係要博和黃Call輪，只宜喺正股再跌多啲至諗，對象係9518，隻輪明年2月到期，現價59仙，溢價7.8%，槓桿率8.7倍。
章盛