馬時亨（圖）雖然封口，但佢嘅新聞日日新鮮。話說噚日陳太四萬出席午餐會，一班記者喺香港會門口等，誰不知期間有好多飛來蜢誤打誤撞走入記者群中，馬時亨就係其中一個。
馬仔一見記者，即刻劃清界線話自己唔係嚟聽陳太講嘢，咁啱約咗人啫，重不停重複話自己趕時間。有幾趕？即時示範你睇：當班馬線重係紅公仔時，佢已心急到想衝過去，好彩有人喝住。
之後有人問起仙股事件，佢一於顧左右而言他。後來佢見到終於有車嚟接，更加語無倫次，叫記者小心：「小心！你行喺黃界要罰錢！」乜黃線唔係剩係限制車咩？
不過佢都唔使驚會再遇到記者，因為噚晚馬仔已經啟程飛去墨西哥，出席明日同後日舉行嘅第九屆APEC財長會議了。
傳真︰2623-9278
電郵︰