信和前執行董事李智康過檔電盈，開始為將開售嘅大盤薄扶林數碼港住宅做熱身。據講，佢最近頻頻同各代理行高層食飯，目的係攞料，同傾吓有乜促銷大計。數碼港最快要年底先賣得，李生咁早收料，梗係想營造排山倒海嘅氣勢。
電盈不斷減人手，都係想慳錢，假若數碼港可以一鋪賣清，公司就可以有大筆資金回籠。呢個係電盈唯一嘅大型地產項目，又係李生過檔嘅第一擊，實在不容有失。
李智康向來以多橋見稱，採用每周嘉年華，請名模靚女表演花生show，搞得有聲有色。今次若果照辦煮碗，又掂唔掂呢？蘭西就估佢重有石破天驚新橋，到適當時機至施展出嚟。新地樓神雷霆嘅珀麗灣一日沽逾千伙，李智康嘅壓力實在唔輕。
蘭西噚日收到新地會訊，見到一幅長實尖沙嘴港景峯圖片，蘭西以為新地搞錯，睇真啲至知係香港仔深灣軒嘅電腦模擬圖片。
發展商起樓因要兼顧好多嘢，搞到個個盤都倒模咁。
深灣軒共三座住宅，有千幾個單位，面積約六百至九百五方呎，兩房及三房設計，預計後年四月落成。
深灣軒係政府首個推出嘅混合式住宅，前年三月由新地以七億四投得。新地要交出三百多個單位畀房協做資助房屋，相信會吸引好多人注意。新地介紹得呢個盤，睇嚟都好快會開售。
為咗促銷小欖愛琴海岸，代理行各出奇謀。8月31日至9月10日，利嘉閣喺屯門、元朗與青山公路沿線住戶必經之地，以及荃灣地鐵站，設立「愛琴海岸全動感展銷廳」，派專人介紹樓盤特色。另外，美聯就披露「愛琴海岸」1至8擊，最特別係歡迎公眾提交方案，一經採用，會獲贈「愛琴之星」水晶。
美聯物業主席黃建業話，地產代理已經進入第四代，唔只要講專業同技巧，重要講包裝。
佢話公司已定下每年花五千幾萬，去推廣業務同形象，還包括強化擔任發展商銷售顧問嘅角色，務求為發展商提供更全面服務。呢方面嘅使費，比以前多咗兩成幾。聽執行董事Victor張講，美聯會用太陽花作為公司象徵。
另美聯已將公關同研究部合併，而港九新界三區、港置同大陸業務部，都由不同公關負責，方便傳媒攞料。
公關員工將增到十人，並且會搵個有十年以上公關經驗嘅人做阿頭。
新地上個禮拜六開放屯門愛琴海岸示範單位，但只係畀新地會會員參觀。蘭西聽聞當日地產代理周圍去撲新地會會員證，咁先可以帶客去參觀，冧客入票都易啲。
發展商成立會員制，目的係聯繫屋苑住戶同管理公司嘅關係，進而吸引非旗下屋苑人士入會。發展商有多啲潛在買家資料，方便日後促銷樓盤。入會有着數，消費購物有折扣，優先參觀示範單位，並且可以平啲買樓。原來會籍有價，唔知有冇得炒呢？
闊別賣樓記招有一段時間嘅新地前賣樓主帥蘇仲強Alfred，今次喺愛琴海岸推廣活動中，同現任主帥周國賢Eric頻頻亮相。雖然話今次只係幫手，但常常不經意地流露出伏櫪之志同雄心未泯。噚日喺美聯搞嘅宣傳會上，就慷慨激昂咁話，深信憑代理嘅拼搏精神，繼珀麗灣之後，愛琴海岸可創造另一個神話。
江澤民主席有三個代表，佢話愛琴海岸都有三個代表，就係代表有理想生活環境；代表發展商以心建家嘅不移之志；代表充滿活力同自強不息嘅精神。縱使其他國家嘅地產市道幾咁好，但係能一日賣出過千個單位，就只有香港做得到。
蘭西
電郵地址：