今季英超聯幾個射手都似乎冇乜運行，好似利記嘅奧雲咁，要到前晚對紐卡素場波，先靠一個十二碼開齋射入今季第一球；如果領隊侯利亞唔係畀足機會佢，睇怕到𠵱家奧雲仔都重係交白卷！
過去三場都正選嘅迪奧夫今場只列後備，放冇咁獨食嘅希斯基落場拍奧雲，兼畀奧雲仔打足全場，侯利亞似乎擺明為佢造就開齋機會。可惜奧雲又腳頭無靈，射極都入唔到，重愈打愈急；幾次應傳唔傳就咁響禁區外起腳射門，真係睇到我求大俠都戥佢心急埋一份。難為嗰啲捧咗利記上盤嘅朋友，如果奧雲仔「弗」啲就唔使臨天光「瀨尿」！
做人也好做球員也好，真係要講際遇，好似南斯拉夫前鋒米積杜域咁，當年效力皇家馬德里時威盡西甲聯賽，可惜轉咗會去意甲費倫天拿後一沉不起！日前佢終於屈就去西乙球會利雲特落班，因為球會所處地方便佢照顧病重嘅女兒；我求大俠聽到佢咁嘅際遇都有啲眼濕濕，但能屈能伸嘅精神就絕對可敬。
今季響英甲搶閘彈出嘅樸茨茅夫，人腳班底可以講已經好強，前景一片大好，不過領隊哈利列納重未心足，最近重想再簽入熱刺中場舒活㖭！唔好話我求大俠陰謀論，如果舒活真係走咗去樸茨茅夫嘅話，哈利列納就真係雙喜臨門，起碼佢個仔列納響熱刺都少咗個人同佢爭位踢！
全球失業大軍又多一人，咪就係我哋嘅「范大將軍」范志毅囉！佢同效力嘅蘇超聯球會鄧地嘅關係已經去到「無偈傾」嘅地步，加上今年實施嘅轉會期限已經過咗，即係話響○三年之前，「范大將軍」都唔會有班落。𠵱家惟有希望英格蘭聯賽會爭取嘅放寬轉會期限通過，等佢可以返英甲搵個新老細啦！
NBA嘅湖人「大塊頭」中鋒奧尼爾決定喺九月十一日為佢嘅右腳大腳趾做手術，呢日咁啱就係美國「九一一」恐怖襲擊一周年，令人聯想到好多嘢；聽聞奧尼爾雖然神高神大，但就好鬼怕開刀，佢揀呢日做手術唔知會唔係藉住嗰日嘅苦難紀念日，嚟減輕自己心理負擔呢？我求大俠默默祝福佢早日康復。