近排城中講得最熱嘅其中一個話題，一定係交通費貴，貴到連我哋嘅廖秀冬局長都要出聲。不過對揸車一族嚟講，地鐵減唔減價都唔重要，因為佢哋關注嘅係汽油費。
好似鄉議局主席劉皇發咁，平日要走勻全新界，去屯門開會、元朗剪綵不特止，重要出中環開立法會，去尖沙嘴飲茶，每日出街就好似香港一日遊咁。佢司機計過，一星期平均入油兩次，每次四百幾蚊，一個星期計落要成千蚊，一個月都好襟計，即使貴為新界王都叫肉刺！
不過廖秀冬暫時淨係掛住搞交通費問題，連好多達官貴人嘅電話都未得閒覆，包括發叔在內，所以養車一族，睇怕都重要繼續捱落去。
話時話，其實發叔搵廖局長，梗係唔單止講吓油價咁簡單，佢重想傾埋更加重要嘅十號幹線同屯門飛機燃油庫問題。雖然城規同環評都通過咗起飛機燃油庫，但係屯門居民依然鬼殺咁嘈；梗係啦，性命攸關，點會唔擔心？一旦油庫照原定計劃起，居民強硬反彈起上嚟，到時葉澍堃、孫公同廖秀冬一齊搵發叔擺平都冇用嘞！
傳真︰2623-9278
電郵︰