港股近兩日跌勢轉急，恒指噚日再跌106點，收9790。美股放假期間，恒指共跌251點，預先反映跌勢，因此噚日美股期指雖全面大跌，但預期周二晚杜指應該唔會跌超過300點，如果杜指跌得少或出現先低後高反彈，港股今日可能跟隨反彈。既然趙飛雲手上嘅恒指Put輪9287有逾30%利潤，所以亦無謂再博，實行先沽出獲利，今日睇定形勢再出擊。
恒指MACD發出轉弱訊號，短中線弱勢已成，反覆下試近期低位9632似勢在必行，若外圍形勢差，下試甚至跌穿911事件低位8894的可能性亦存在。不過，恒指已連跌8日，共跌730點，短線先有技術反彈十分正常，但相信反彈幅度有限，估計止於9900至10000之間，但對於炒恒指輪而言，裏面可能是10至30%的波幅，因此把握獲利時機是非常重要。恒指短期若出現反彈，可在9900附近重新吸納Put輪。
趙飛雲覺得炒輪有時好似打麻雀，如果一手牌只係差兩隻，究竟係食混一色3番，定係繼續造清一色雙辣，其實唔易決定，不過有胡唔食打窒條氣就手尾長。當然，趙飛雲亦大有可能沽早咗，港股今日可能跟隨美股大跌，9287繼續飆升，但到時高追亦無所謂，當收咗錢洗牌打過另1鋪。
趙飛雲