在街市中，你可找到各種新鮮蔬果、海鮮、肉類，而在這個意大利街市，你就可以用$168食勻新鮮熱辣的國際美食。餐廳名叫Marche，意大利文解作菜市場，故餐廳亦仿效菜市場的檔口式設計，加上堆滿枱面的新鮮材料，顧客可隨意挑選，再由大廚即席為你烹調。一個價錢任你食，就是這個另類街市的特色。
記者：黃婉冰 攝影：伍慶泉
生蠔味美不用多說，但原來從醫學角度看來，還有補腎肝、養陰補血作用，同時亦能清熱解毒，其豐富荷爾蒙更有助提高性能力，雖然功效多多，但還是適可而止，不宜過量。
燒扒Counter有豬、牛、羊、雞四款任揀，全部以扒爐即時扒熟，其中新西蘭西冷扒最受歡迎。牛扒用菜油、香草浸過一日，扒時再撒上味粉吊味，幾成熟當然由人客話事，另有四種不同的汁──黑椒、刁草忌廉、白菌忌廉、番茄汁任挑選，鬼佬口味的還有香草牛油，趁熱塗上，即時與肉汁融合。
試味報告：西冷扒不會過厚，脂肪亦不多，吃多一兩塊都不怕膩，加汁吃更惹味，特別是黑椒汁。
意大利麵即叫即製，每日都會有三款供選擇，全部醬汁都是自家調製，新鮮製麵條會比包裝煙韌有口感。配料有來自澳洲的巨型蜆、鮮蝦、魷魚、魚肉，白酒忌廉汁伴海鮮，配搭口味大眾化，即製可避免麫條浸在汁裏過耐而影響口感。
試味報告：螺絲粉煮得煙煙韌韌，不會過腍，保持口感，海鮮新鮮，蜆與蝦比想像中大隻，白汁較濃稠，選擇鮮茄汁可減低膩感。
瑞士薯餅是瑞士菜中最經典的菜式之一，用肉軟香甜的美國靚薯仔，先蒸至七成熟，再刨成一條條幼絲，即席煎成一塊塊薄薯餅，當兩面煎至微熟，香脆上碟便可，放上香煎德國牛仔肉腸，加酸忌廉、車打芝士、炸煙肉碎就食得。
試味報告：薯餅好明顯食到一條條的薯仔肉，外表香脆，內裏保持爽口，不似一般的「粉」，加上有濃郁肉味的牛仔腸調和，不覺單調，一碟適宜與人分享，免得過飽。
現時是太平洋生蠔當造的季節，隻隻自然肥嘟嘟又夠大，雖然不及法國咁矜貴，但蠔身厚且鮮甜，沒有很濃烈的海水味，散叫價$12一隻，蠔客隨時可以食番夠本又回本。
試味報告：生蠔夠新鮮，雖然有些蠔身比較瘦，但勝在可以慢慢揀，揀到合心水為止。
薄餅是傳統意大利做法，餅底薄如紙，可以放心享用。餅底經大師傅搓開後，薄得有如餅乾，客人可揀選各款材料，有素菜又有肉，最受歡迎的有新鮮菠蘿、火腿、黑橄欖，再撒滿芝士，放入爐內焗幾分鐘，就有熱辣Pizza送上。
試味報告：薄餅底不會因過薄而變得乾身，餅邊夠脆夠香口，餅中心有少許軟熟，趁熱食最好味。
餐廳共有七個Counter，分別設於兩層樓，所以選取食物時不免要走上走落，所以最好先食完第一層的，再試第二層，同時一次過揀多一、兩款，那便不用走來走去浪費時間。
店名：MOVENPICKMARCHERESTAURANT
電話：28492000
地址：山頂道128號凌霄閣6樓及7樓（由4樓電梯直上）
座位：400個
營業時間：星期一至五上午11時至晚上11時；星期六、日及公眾假期上午9時至晚上11時。
付款方法：現金及信用卡（Visa,Master,AE,Diners）
收費：星期一至五成人$168，4-12歲小童$84（包咖啡或茶一杯），星期六、日及公眾假期成人$198，小童$99（包任飲咖啡或茶及一杯果汁或紅、白酒或汽水）。
供應時間：上午11時至下午5時