季初波，下盤多，果然又喺西甲聯應驗！周日嘅八場波有五場開下盤，其實一啲都唔奇，奇就奇在雷聲大嘅巴塞臨尾香，俾體育會迫和，搞到想攞番本都唔得。如果唔係巴塞嘅古華特同沙維奧拿輪流做敗家仔，射極都入唔到第二粒，就唔使拋離唔到等報應嘞。
我求驗客認為教練雲高爾要為和波負責，因為佢無厘頭派一啲後生嘅落去，好似睇唔起對手咁。話晒體育會都係傳統強隊之一。講真，雲高爾好講原則，唔係佢買嘅佢唔會點照住，於是就唔用列基美同啲巴西兵。不過𠵱家最嚴重問題係鋒線唔夠銳，古華特同沙維奧拿都太柔，蛇無頭不行，千奇唔好俾我求驗客批死，買唔到哈索賓基係巴塞今屆失敗嘅伏線。
克羅地亞網球手伊雲尼斯域近排真係運滯，早前佢借咗自己架成百萬港幣係嘅保時捷俾嗰friend揸，結果撞爛咗；早幾日佢老竇揸佢艘成二千萬港元嘅遊艇去威又撞爛埋，真係肉都赤。呢位前溫布頓冠軍對人慷慨眾所周知，但我求驗客認為，雖然錢財身外物啫，但都要錫住㗎！
拉素賣咗尼斯達畀AC米蘭，最開心嘅可能係曼聯！事關上年曼聯將荷蘭後衞史譚賣畀拉素嗰陣，只係收咗部份轉會費，重有成千二萬英鎊尾數一直未收到，咪因為拉素財困囉！𠵱家尼斯達轉會就有一千六百幾萬鎊落袋，點計都找到呢條數嘞啩？至少都畀番啲利息先啦！
效力比利時班霸安德烈治嘅南韓國腳薛琦鉉，唔知係咪畀稻本潤一、孫繼海、小野伸二等人嘅出色表現刺激到，連埋上周末進行嘅比利時甲組聯賽第四周秩序，薛琦鉉已經連續四場有入球，目前重以六個入球高踞射手榜首位，我求大俠都與有榮焉，亞洲球員好波！
意大利有個靚女最近相信幾煩，咪就係朗拿度個靚老婆美蓮妮囉！𠵱家老公就過咗去西班牙搵食，照計美蓮妮都應該嫁雞隨雞咁跟埋過去嘅，但佢響意國嘅女子足球事業又如日中天；如果佢決定為事業留響意大利，又唔能夠昅實個「花弗」老公喎！今次真係左右為難，唔知點辦喇。