恒指第7日下跌，萬點失守，收9896。7月底8月初，恒指小雙底喺9800以下，外圍若然唔妥，第3次試底唔出奇，但唔適宜睇得太淡，今回再試上次低位，值得博反彈。
跌市中，中銀（2388）穩如鐵塔，收8.40元，平上日水平。但啲中銀Call輪唔生性，成交金額打入10大嘅9458，收49.5仙，跌4.5仙，創掛牌以來最低。隻輪明年2月到期，溢價12%，槓桿率17倍。正股有護盤行動，每個價位買盤都係球球聲，當然賣盤陣容亦唔少嘢，都係球球聲。中銀7月掛牌頭兩日最低8元唔計，其餘時間最低8.15元。若然再試低位，不妨細注敲吓9458，大概喺45仙左右上車。
電訊股沽壓好重，中移動（941）跌2.1%，聯通（762）散5.2%，電盈（008）唔見5%，𠵱家打電訊股Put輪主意可能已經遲咗，不如諗吓佢哋再跌之時，搵個別Call輪博反彈。
太短期嘅電訊Call輪，風險好大，要諗就諗啲長期嘅，例如中移動Call輪9376同9405，兩隻輪都係明年1月到期，時間值冇縮水縮得咁快。9376昨日收市報10.9仙，吼9.5仙買入；9405昨日收市報12.5仙，吼10.7仙買入。
章 盛