老師被學生打傷，學校要賠一百五十六萬，報紙話此例一開，學校勞工保險費勢必向上調整。講起勞工保險，萬事德就苦酒滿杯，上個月響「爛撻撻」食飯，萬事德例牌請客，飲兩杯紅酒佢就吐苦水，話唔少人詐傷攞勞工保費賠償，成日話送貨撞傷之後，唔開得車，要支病假薪水，但係呢，日頭就去做的士司機替工噃，萬事德知道之後，條氣唔順，搵私家偵探去搜集證據，影埋相。不過，裁判署仍然話工人得直，勞工處逼佢發薪水。萬事德話：「真係有事嘅話，我會加倍畀恩恤費㖭，但大人大姐，明明係冇事，重要呃我，你話條氣點順。」
之後碰到建築邦，問佢地盤情況如何，建築邦話：「經常有工人睇完醫生之後就唔肯返工，要攞勞保嘅啦，我哋亦有私家偵探去查，揭發唔少假嘢，詐諦嘢，但每次都告唔贏，勞工處偏幫工人，裁判署啲官心理上認為我哋大公司夠小器，請私家偵探追蹤都唔肯磅水畀勞工，因此我哋冇次贏。呢個世界已經冇人講原則問題，只講金錢輕重問題，資本家一定冇良心，社工一定係天使，重有乜好講。」
再問保險古，保險古話：「直情曳啦，勞保費冇法子唔加，加多咗，好多客咕咕聲，唔肯買足百分之一百，自己冒番一啲風險。咁樣係危險動作嚟嘅，我哋期期以為不可，但生意難撈之時，我哋亦好理解。我諗收保費提供評估增值服務，就係私家偵探！」